Policia ka arrestuar një 29-vjeçar nga Prrenjasi, i cili plagosi me armë një të ri dhe më pas grabiti me forcë makinën në tentativë pë t’u larguar nga vendi i krimit.
Ngjarja ndodhi në orët e vona të mbrëmjes së sotme në një lokal në fshatin Kakavec, Prrenjas, ku shtetasi Afrim Radiçi, 29 vjeç, pas një konflikti të çastit për motive të dobëta ka plagosur me armë zjarri pistoletë shtetasin Xh.P., 23 vjeç, banues në Kakavec .
Pas arrestimit të tij, policia ka gjetur dhe sekuestruar në cilësinë e provës materiale armën e krimi si dhe makinën e vjedhur. Raportohet se i plagosuri fatmirësisht ndodhet jashtë rrezikut për jetën falë ndërhyrjes në kohë të bluzave të bardha.
Njoftimi i policisë
“Falë reagimit të shpejtë e profesional të Policisë, kapet në kohë reale autori i plagosjes me armë të 22 vjeçarit.Në cilësinë e provës materiale është sekuestruar arma e zjarrit Pistoletë tip “Zantava” me 3 fishekë, si dhe automjeti i vjedhur.
Shtetasi Afrim Radiçi në tentativë për t’u larguar nga vendi i ngjarjes ka dalë në rrugë dhe nën kërcënimin e armës ka ndaluar mjetin tip “Golf” në pronësi të shtetasit A.B., të cilin e ka marrë dhe është larguar me shpejtësi nga vendi i ngjarjes. Falë reagimit të shpjetë të Policisë Librazhd dhe mirorganizimit të punës u bë e mundur që rreth 60 kilometra nga vendi i ngjarjes , në fshatin Dorez , të kapej shtetasi Afrim Radiçi, autori i dyshuar i dy ngjarjeve, plagosjes me armë të 22 vjeçarit si dhe të rrëmbimit të automjetit nën kërcënimin e armës.
Në cilësinë e provës materiale është sekuesrtruar arma e krimit si dhe automjeti tip “Golf”.Grupi hetimor po vijon punën për zbardhjen dhe dokumentin e plotë të kësaj ngjarje”.
