GJykata ka vendosur “detyrim paraqitje” per kapitenin e Partizanit Alban Hoxha, i cili u arrestua këtë të dielë, pasi u kap i dehur në timon.
ARRESTIMI
Shkaku i arrestimit të tij ishte alkoli, pasi policia e kapi atë në gjendje të dehur, ndërsa drejtonte automjetin e tij në afërsi të Parlamentit, në rrugën “George W. Bush”, në Tiranë.
Gazeta ‘Panorama’ shkruante se referuar burimeve nga Policia e Tiranës mësohet se nga matja e nivelit të alkoolit me aparaturën “Drager”, ka rezultuar se portieri i Partizanit e kishte “shkelur” me pijet alkoolike.
Niveli i alkoolit, në të dy provat me test, ka rezultuar 0.52 miligramë për litër. E thënë ndryshe 0.22 miligramë për litër më shumë sesa niveli maksimal i lejuar për të drejtuar makinën, që është 0.30 miligramë për litër.
Në këto rrethana, Alban Hoxhës i ishte bërë e qartë nga efektivët Rrugorë që do të shoqërohej në Polici, për veprën penale “Drejtim i automjetit në gjendje të dehur apo pa dëshmi”, parashikuar nga neni 291 i Kodit Penal. Burimet thanë se kapiteni i Partizanit nuk ka bërë rezistencë, por ka dalë menjëherë nga automjeti, siç i është kërkuar dhe më pas është shoqëruar në drejtim të ambienteve të Komisariatit nr.1.
Vetë 31-vjeçari, mungoi javën e fundit ndaj Flamurtarit, por rikuperimi dukej se po shkonte mirë, dhe do të ishte gati për takimin e ditës së premte ndaj Tiranës.
