Gjykata e Krujës e ka pranuar kërkesën e Rexhep Rrajës për gjykim të shkurtuar. Është caktuar që seanca e radhës për djalin e deputetit të PS-së Rrahman Rraja të mbahet më 4 dhjetor.
Ndaj Rexhep Rrajës ishte vendosur masa e sigurisë ‘arrest me burg’. Vetëm një akuzë rëndon mbi supet e 24 vjecarit Rexhep Rraja, i cili u vu në pranga pas dhunës së ushtruar ndaj të dashurës së tij Xhisiela Maloku: Përndjekje.
Me pranimin e kërkesës për gjykim të shkurtuar në rast dënimi, djali deputetit socialist do përftojë ulje dënimi me 1/3.
DOSJA
Ajo që bie në sy të dosjes përfundimtare, që i është dërguar Gjykatës është fakti që e cilësuara si viktimë e përndjekjes, Xhisiela Maloku, i ka qëndruar dëshmive të saja ku ka denoncuar dhunën fizike dhe presionet që i janë bërë nga Rexhepi, si për të vazhduar lidhjen e tyre ashtu edhe për t’u tërhequr nga denoncimi.
Këto fakte Prokuroria i ka vërtetuar edhe me tabulatet telefonike si dhe me përgjimet ambientale.
