Ditën e sotme zhvillohet takimi i përbashkët i dy qeverive shqiptare, ajo e Kosovës dhe e Shqipërisë.
Ashtu siç ishte njoftuar më herët, takimi do të mbahet në Pejë. Në fokus të takimit, do të jenë diskutimet për ekonominë e dy vendeve.
Mediat kosovare shkruajnë se pas zotimit për unifikimin e doganave, Kosova dhe Shqipëria pritet të aprovojnë edhe kërkesën e kahershme të Bashkimit Evropian për heqjen e tarifës së shërbimit të romingut, në kuadër të telekomunikimit ndërmjet këtyre dy shteteve.
Por një lajm të tillë, presidenti i Serbisë nuk e ka pritur mirë.
”Kjo është hiprokizi e fundit, jo vetëm nga shqiptarët që jetojnë në Kosovë dhe Shqipëri por nga të gjithë ata që e lejojnë këtë”, ka deklaruar presidenti serb.
Kujtojmë se marrëdhëniet mes Serbisë e Kosovës do të jenë të distancuara dhe plot tension pas dështimit të Kosovës për t’u bërë pjesë e Interpol si dhe vendosjes së tarifës për produktet serbe nga Kosova në masën 100 për qind.
Axhenda e parashikuar për mbledhjen:
10:15 Ceremonia shtetërore e mirëseardhjes
10:30 Fillimi i mbledhjes së përbashkët të Qeverisë së Republikës së Kosovës dhe Qeverisë së Republikës së Shqipërisë
12:00 Ceremonia solemne e nënshkrimit të marrëveshjeve ndërmjet dy qeverive
12:30 Konferenca e përbashkët për media e Kryeministrit të Kosovës, Ramush Haradinaj dhe Kryeministrit të Shqipërisë, Edi Rama.
13:00 Fotografia e përbashkët e të dy kabineteve qeveritare.
Mbledhja e përbashkët Shqipëri-Kosovë do të jetë e pesta e kësaj tradite që ka nisur nga Prizreni, më 11 janar 2014.
