Prokurori i Prokurorisë së Elbasanit merret në dëgjesë nga Komisioni i Pavarur i Kualifikimit. Ai aktualisht është prokuror i komanduar në Prokurorinë e Përgjithshme në Tiranë.
Besnik Cani nuk është një emër i panjohur në drejtësi. Në vitin 2015 Cani largohet nga posti i drejtuesit në Prokurorinë e Shkodrës duke u transferuar në atë të Elbasanit. Prokurori gjithashtu është kandidat për Këshillin e Lartë të Prokurorisë, ndërsa pas shqyrtimeve dhe kontrolleve, KPK do të marrë vendimin nëse Cani i plotëson kriteret ose jo.
Treshja gjykuese për Prokurorin është e përbërë nga Lulzim Hamitaj, Brunilda Bekteshi dhe Olsi Komici.
Nga të dhënat e siguruara dhe nga deklarimet e bëra nga vetë prokurori, KPK-ja duke iu referuar ILDKPKI-së thekson se Cani ka bërë deklarim të saktë të pasurisë.
Sipas ILDKPKI, prokurori gjithashtu ka burime të mjaftueshme financiare. Besnik Cani ka apartament 117 m² në ‘Don Bosko’ si dhe një truall 633 m² plus ndërtesë 220 m² në periferi të Tiranës, saktësisht në Paskuqan. Gjithashtu po në Paskuqan ai zotëron një sipërfaqe trualli prej 363 metra katrorë.
Detaje të tjera dalin në dritë në lidhje me dokumentet e shtëpisë së tij në Paskuqan, pasi theksohet se banesa e Prokurorit nuk ka dokumente justifikuese. Ai ka deklaruar se shtëpia është ndërtuar nga paratë e emigracionit.
Por pavarësisht deklarimit të Prokurorit, Komisioni i Pavarur i Kualifikimit thekson se Besnik Cani nuk justifikon ndërtimin e shtëpisë, ndërsa ka edhe mangësi në deklarimet e pasurisë së tij.
