Autoriteti Rrugor Shqiptar ka nisur punën për ngritjen e grueve që do të bëjnë vlerësimin për shpronësimet për Unazën e Madhe, projekt i cili ka ngritur në protesta prej thuajse 20 ditësh banorët e zonës së Astirit në Tiranë.
Afrim Qendro, drejtori i ARRSH-së, ka firmosur ngritjen e 3 grupeve të punës me 27 anëtarë, që kanë për detyrë të kryejnë matjet dhe vlerësimet e të gjitha atyre pasurive që preken nga projekti i Unazës së Madhe.
Pikëpyetje mbetet deri më tani sesi do të procedohet me ato objekte që preken nga projekti por janë të palegalizuara. Kryeministri e ka dhënë qëndrimin e tij se objektet e paligjshme s’mund të legalizohen, një qëndrim që e përkrah dhe ligji për shpronësimet.
Ditën e nesërme pritet që në parlament, Rama të mbajë një qëndrim zyrtar dhe të qartë për protestat dhe debatin e madh që ato kanë hapur në Tiranë, ndërsa në ambientet jashtë parlamentit, banorët e Astirit do të vijojnë protestat e tyre për dëmshpërblim të të gjitha banesave që do të preken nga projekti.
