Zv.Kryetari i LSI, Luan Rama ka reaguar për 74-vjetorin e çlirimit të Tiranës, teksa shkruan se sot përkujtohet dita kur u derdh gjak në luftën kundër pushtuesit të huaj.
Rama ka ironizuar duke sugjeruar se “meqenëse edhe sot, si në çdo 17 nëntor njerëzit e pushtetit do të shkojnë të bëjnë homazhe nderimi e do të vendosin kurora me lule pranë monumentit të “Partizanit Çlirimtar”, le t’ia ndërrojnë edhe emrin monumentit, vepër e skulptorit Andrea Mano, e ta quajnë “Ballisti Çlirimtar”, në nderim të luftës së madhe dhe sakrificave të panumërta që Mid’hat Frashëri dhe ballistët e tij kanë bërë për çlirimin e Tiranës dhe të atdheut nga pushtuesit nazifashistë!”
Reagimi i plotë
17 nëntori i Tiranës antifashiste!
Tirana antifashiste sot kremton ditën e çlirimit prej pushtuesve nazifashistë.
Tirana antifashiste sot nderon luftën partizane dhe saktificat e qytetarëve të saj, të cilët dhanë gjithçka e pa asnjë rezervë, duke bënë një me partizanët e lirisë.
Tirana antifashiste sot nderon gjakun e derdhur në luftë kundër pushtuesve të huaj dhe bashkëpunëtorëve të tyre, kuislingëve shqiptarē.
Tirana antifashiste sot përkujton ditën e madhe të lavdisë së vet, 17 nëntorin e lirisë!
E meqenëse edhe sot, si në çdo 17 nëntor njerëzit e pushtetit do të shkojnë të bëjnë homazhe nderimi e do të vendosin kurora me lule pranë monumentit të “Partizanit Çlirimtar”, le t’ia ndërrojnë edhe emrin monumentit, vepër e skulptorit Andrea Mano, e ta quajnë “Ballisti Çlirimtar”, në nderim të luftës së madhe dhe sakrificave të panumërta që Mid’hat Frashëri dhe ballistët e tij kanë bërë për çlirimin e Tiranës dhe të atdheut nga pushtuesit nazifashistë!
