VIDEO/PD: Të arrestohet pa vonesë, Dako është në komunikim të vazhdueshëm me bandat

Partia Demokratike vijon ende të këmbëngulë për arrestimin e Vangjush Dakos.

Në deklaratën para mediave, deputeti Klevis Balliu këmbëngul se përgjimet në dosjen 339 tregojnë se Dako është në komunikim të vazhdueshëm me bandat para dhe pas zgjedhjeve.

Balliu shprehet se i vetmi që po e mbron Dakon është Edi Rama, duke e ndihmuar të manipulojë dhe shkatërrojë provat.

Deklarata e plotë:

Kryetari i Bashkisë së Durrësit, Vangjush Dako, është simboli i pushtetarit, i cili duhet të paguajë me burg krimin për blerjen e votave nëpërmjet bandave dhe krimit të organizuar.

Përgjimet e dosjes 339 e provojnë qartë krimin elektoral të Vangjush Dakos, i cili është tani më i vetmuar se kurrë në publik.

Edi Rama po e mbron me metoda mafioze, duke mbajtur të kyçur në sirtarët e Prokurorisë dosjen e pushtetit të tij ilegjitim, por as vetë Rama nuk guxon ta mbrojë në publik bashkëpunimin e Vangjush Dakos me kriminelët.

Përgjimet e dosjes 339 kanë faktuar se Vangjush Dako është në komunikim të vazhdueshëm me bandat para, gjatë dhe pas zgjedhjeve.

* Dosja 339 fakton se Kryetari i Bashkisë së Durrësit, pasi ka blerë vota, bashkë me trafikantët ndërkombëtarë të drogës, komunikon me Niçen për të falenderuar kreun e bandës, dy ditë pas zgjedhjeve.

* Nga përgjimet shqiptarët kanë parë sesi banda e Avdylajve, një pjesë e të cilës është në burg për trafik ndërkombëtar droge, i kërkon Dakos të ndërhyjë për të larguar forcat speciale.

Faktet e krimit elektoral të Vangjush Dakos janë të qarta dhe për këtë krim ai duhet të jetë në burg!

Vangjush Dako duhet të arrestohet pa vonesë.

Çdo ditë në liri ai shkatërron prova dhe manipulon dëshmitarët, i ndihmuar plotësisht nga kryeministri i vendit Edi Rama.

Në Shqipëri nuk ka për të patur as drejtësi, as luftë kundër krimit dhe asnjë zhvillim normal pa u ndëshkuar krimi elektoral që mban në pushtet qeverinë ilegjitime të Edi Ramës!

/DRONI.al/