Banorët e zonës e njihnin viktimën Fatmir Hodo si një person të qetë dhe që nuk ngatërrohej me njeri.
Sipas tyre, ndonëse ishte banor i qytetit të Vlorës, ai ishte çdo ditë i pranishëm në fshat, si kreu i Njësisë Administrative të Kotës.
Njëri prej banorëve të këtij fshati tregoi dje per “Panorama” si e kishte mësuar ngjarjen e rëndë për zyrtarin e Bashkisë.
Si e mësuat ngjarjen?
Ishim diku në një tjetër vend duke luajtur domino me njëri-tjetrin dhe një banor i zonës erdhi dhe na tha cfarë kishte ndodhur dhe që ishte vrarë një person. E morëm vesh që ishte Fatmir Hodo dhe në fakt jemi habitur pasi ai ishte një njeri i qetë dhe i nuk ngatërrohej me askënd. Kemi lënë lojën që luajmë ne si moshatarë dhe jemi afruar pranë vendit ku edhe ndodhi ngjarja.
Dëgjuat krismë?
Jo, në fakt nuk kemi dëgjuar krismat. E morëm vesh nga një banor i zonës që po kalonte pranë vendit ku edhe ndodheshim, që na tregoi se kishte ndodhur një vrasje dhe se kush ishte vrarë.
Si e njihnit ju viktimën Fatmir Hodo?
Ishte i qetë dhe nuk ngatërrohej me njeri. Ne nuk dimë apo nuk kemi dëgjuar që të kishte ndonjëherë probleme me ndonjë person këtu në fshat. Kishim respekt për Fatmirin dhe e njihnim si person pa shumë fjalë, të qetë dhe që nuk ishte ngatërruar me ndonjë njeri. Ndaj edhe u habitëm kur na thanë se kush ishte vrarë.
Po autorin e njihnit, vinte shpesh ai këtu në fshatin tuaj?
Në fakt jo, nuk e njihnim. Nuk është nga fshati ynë, është nga një tjetër fshat rreth gjysmë ore larg. Nuk e njihnim. Dhe nuk e dimë se kush është. Vetëm nga mediat e mësuam emrin e atij që kreu vrasjen.
