Edhe pse banorët po protestojnë prej disa ditësh, për të mos lejuar shembjen e ndërtesave të tyre, qeveria ka vijuar me planin e saj.
Mësohet se plani i projektit po vihet në zbatim, duke filluar me heqjen e godinave ekzistuese.
Si fillim është hequr ‘Shqiponja’ e cila u vendos para 6 vitesh. Ajo është vepër e derdhur në çelik të rëndë, me lartësi 10 metra (shqiponja, 6 metra e lartë dhe me bazament katër metra), e cila u vendos me rastin e 100 vjetorit të Pavarësisë në një ceremoni të organizuar nga kryeministri Berisha e kreu i Bashkisë Lulzim Basha, në nëntor 2012.
Duke iu referuar planit, në vend të Shqiponjës do të ndërtohet një mbikalim për të lehtësuar qarkullimin e automjeteve.
Kjo është prova e parë që qeveria nuk do të kthehet nga plani i saj për të prishur dhe shtëpitë e banorëve të Unazës së Re. Më herët ata vijuan me protesta, ku dhe bllokuan rrugët duke sjellë tensione mes shoferëve. 
