Një 26-vjeçar i dha fund jetës së tij duke u vetëvarur afër banesës së familjes. Viktima quhet Edmons Tafani, nga fshati Marinëz i Belshit.
Ishin prindërit ata që e gjetën 26-vjeçarin të pajetë, të varur me litar në magazinën pranë shtëpisë. Panorama shkruan se prindërit e 26- vjeçarit ishin vënë në kërkim të djalit. Dy prindërit e Edmondit, gjatë marrjes në pyetje nga grupi hetimor, janë shprehur se, djali i tyre ishte i heshtur kohët e fundit, por kishin menduar se gjithçka ishte kalimtare.
Ata janë shprehur se paraditen e së hënës, i riu ishte larguar nga banesa pa lajmëruar se për ku ishte nisur dhe pasi nuk u përgjigjej në telefon, nisën ta kërkonin.
Policia, pas njoftimit të marrë, shkoi menjëherë në vendin e ngjarjes dhe nga këqyrja e trupit të të riut mësohet se nuk janë vërejtur shenja dhune.
Nisur nga kjo dhe sipas mjekut ligjor, përjashtohet pista e ndonjë ngjarjeje kriminale dhe mbetet në hetim ajo e vetëvrasjes.
Ndërkohë, grupi hetimor po punon për zbardhjen e rrethanave që çuan 26-vjeçarin drejt aktit fatal. Paraprakisht, dyshohet se Edmond Tafani ka kryer vetëvrasje në kushte të rënda psikologjike dhe pavarësisht se nuk ka qenë i diagnostikuar, nisur dhe nga deklarimet e prindërve, dyshohet se ka qenë i prekur nga depresioni.
