Mediat greke vazhdojnë të shkruajnë detaje të tjera lidhur me Konstandinas Katsifas. Ceremonia mortore ishte shtyrë për disa ditë për shkak se familja ende nuk e ka marrë trupin e tij, ndërkohë që i nënshtrohej ekspertizave.
Ata kanë bërë kërkesë zyrtare sot në Prokurori për të tërhequr trupin nga morgu i QSUT-së. Avokati më herët për mediat greke tha se familjarëve do t’iu kthehet trupi të martën.
Ndërkohë, mediat greke shkruajnë se për varrimin e tij pritet të vijnë një numër i madh grekësh.
Drejt Shqipërisë pritet që të udhëtojnë mbi 2 mijë persona për të marrë pjesë në funeralin e tij në fshatin Bularat.
“Mbi mijë qytetarë të Vorio Epirit përgatiten të shkojnë në Bularat në funeralin e Kacifas, që pritet të kthehet në protestë. Klima në minoritetin grek është përkeqësuar.
Ekziston rreziku që marrëdhëniet greko-shqiptare të kthehen prapa 10 vjet për shkak të kësaj ngjarje” shkruan ‘Kathimerini’.
Konstantinos Kacifa u vra 8 ditë më parë nga RENEA, pasi qëlloi me breshëri mbi policinë. Ai nuk pranoi të dorëzohej dhe RENEA e qëlloi. Kacifa njihej si ekstremist grek dhe ishte pjesë e grupeve nacionaliste-ekstremiste greke.
