5 shtetasit e arrestuar nga policia në Shkodër, gjatë një operacioni kanë dalë para gjykatës për të marrë masën e sigurisë.
Ata akuzohen se akomodonin shtetasit e huaj të vendeve të treta, kryesisht sirianë, për t’i trafikuar drejt Malit të Zi me destinacion përfundimtar vendet e BE-së.
Gjykata vendosi masën arrest me burg 30 ditë për Ndue Ulaj, 33 vjeç, banues në fshatin Vrakë, Malësi e Madhe, Griseld Dekovi, 24 vjeç dhe Gjokë Murçaj, 33 vjeç banues në Shkodër.
Ndërkohë që për Sajmir Karaj, 34 vjeç, banues në Tiranë dhe Florind Tole, 26 vjeç, banues në Tiranë gjykata vendosi lirimin e tyre përkundrejt garancisë pasurore.
Njoftimi i policisë për operacionin ‘GRE-HOT’
Nga strukturat e Drejtorisë Vendore të Policisë Shkodër në bashkëpunim me Prokurorinë e Rrethit Gjyqësor Shkodër, Drejtorinë e Forcës së Posaçme Operacionale Tiranë, pas një hetimi disa mujor u bë finalizimi me sukses i operacionit të koduar “GRE-HOT” ku në përfundim të këtij operacioni u arrestuan 5 shtetas.
Arrestimi i këtyre shtetasve u bë pasi gjatë hetimeve të zhvilluara nga ana e strukturave të Policisë, këto shtetas siguronin pritjen, transportimin dhe ambientet e akomodimit si hotele dhe shtëpi banimi për shtetasit e huaj të vendeve të treta, kryesisht sirianë, dhe bënin të mundur trafikimin e tyre nga territori i Republikës së Shqipërisë drejt Malit të Zi me destinacion përfundimtar vendet e BE-së.
Ky grup i strukturuar kriminal në trafikimin e qenieve njerëzore ushtronte aktivitetin nga shteti i Greqisë në qytetet Korçë- Elbasan- Tiranë- Lezhë- Shkodër- Malësi e Madhe dhe më pas kalimi në Malin e Zi.
Në cilësinë e provës materiale janë sekuestruar:
* 3 automjete, të cilët përdoreshin për transportimin e shtetasve të huaj.
* një sasi Euro të gjetura personave të arrestuar
*dhjetëra telefona celularë dhe karta SIM
Materialet iu referuan Prokurorisë së Rrethit Gjyqësor Shkodër për veprat penale “Trafikimi i personave te rritur” dhe “Ndihma per kalim te paligjshem te kufijve” parashikuar nga nenet 110/a dhe 298/3 të Kodit Penal.
