Ka zgjatur 2 orë dëshmia e babait të Kostandinas Katsifas. Ai u paraqit në Prokurorinë e Krimeve të Rënda, për të dhënë deklaratën e tij ndaj vrasjes së të birit.
Burimet nga Prokuroria bëjnë me dije se babai i Katsifas kërkoi zbardhjen e vrasjes duke iu qëndruar të njëjtave pretendimeve të bëra për mediat greke disa ditë më parë.
Babai i Kostandinasit, Jani Katsifas, u shpreh për mediat se i biri donte që fshati të kishte një frymë frymëzuese patriotike për helenizmin.
“Që kur erdhi ai e ngriti flamurin grek në kodrën që ranë nga grekët. Ai donte që fshati të kishte një frymë frymëzuese patriotike për helenizmin”, tha ai.
Gjithashtu , edhe konsulli grek në Shqipëri, zhvilloi ditën e djeshme një takim tek prokuroria e Krimeve të Rënda lidhur me hetimet për vrasjen e Kostandinos Kacifas, në Bularat të Gjirokastrës.
Ngjarja ndodhi ditën e dielë kur Kostandinas Kacifa nisi të qëllonte me armë zjarri në ajër, duke shkaktuar panik tek banorët e zonës, të cilët ishin mbledhur në qendër për të festuar festën e Greqisë, e cila si çdo vit po organizohej edhe në këtë fshat.
Menjëherë në drejtim të vendit nga vinin të shtënat shkuan shërbimet e Policisë të cilat ishin të dislokuara në qendër të fshatit pasi do zhvillohej aktivitet me rastin e festës së Greqisë.
Burime zyrtare nga policia bënë me dije se shtetasi Kostandinos Kaçifa pasi ka parë shërbimet e policisë që po afroheshin në drejtim të tij ka hapur zjarr me breshëri ndaj punonjësve të policisë duke rrezikuar jetën e tyre. Pas kësaj nisi aksioni i policisë për ta kapur të riun, i cili duke qenë se nuk pushonte së gjuajturi me armë ndaj bluve, këta të fundit e qëlluan me armë në kraharor për të ndaluar sulmin.
