Kryeministri Edi Rama shkarkoi nga detyra avokaten e Shtetit, Alma Hickën. Duke mos dhënë motive shumë të qarta, në reagimin e fundit, Rama tha se ajo kishte kërkuar largimin për arsye personale.
Reagimi i Edi Ramës:
Kazanët po ziejnë një broçkull për “shkarkimin” e Alma Hickës. Në fakt Alma u largua me dëshirën e saj, për arsye krejt personale e për gjithë keqardhjen time që e konsideroj një Avokate të shkëlqyer të Shtetit. Me neveri për kazanët i them Almës mos u mërzit e paç vetëm sukses.
Por, ndërkohë, kryeministri ka emëruar (propozim i tij), Artur Metani, i cili nuk është i panjohur më parë. Ai është me profesion jurist dhe është vëllai i ish-ministres Eglantina Gjermeni.
Më herët Metani ka qenë këshilltar i kryeministrit Rama për sigurinë, si dhe kandidat për byronë e hetimit. Në vitet 2000-2004 ka qenë drejtor i programeve të drejtësisë të Soros.
Ndërsa në vitet 2004-2012 ai ishte këshilltar i Presidentit Moisiu dhe më pas i Bamir Topit për drejtësinë. Pozicioni që Metani ka mbajtur së fundi ka qenë ai kreut të departamentit të antikorrupsionit në kryeministri.
