Patrulla e policisë në Gjirokastër u qëllua nga një shtetas grek, i cili është ende në kërkim.
Bëhet fjalë për Kostandinos Kaçifa i cili kishte qëlluar me armë zjarri në ajër gjatë festës së Greqisë në fshatin Bularat në zonën e Dropullit.
Pas këtij veprimi, policia kishte shkuar për të arrestuar autorin, por ky i fundit ka qëlluar edhe makinën e policisë dhe më pas është larguar në drejtim të Greqisë.
Sipas mediave lokale në Gjirokastër, i riu është pjesë e forcave speciale në Gjirokastër. Së fundmi, po qarkullojnë edhe foto të të riut, i cili aktualisht është vënë në kërkim nga policia në bashkëpunim me forcat RENEA dhe Shqiponja.
Ndërkohë po burime të tjera medatiake bëjnë me dije se autori i dyshuar për ngjarjen është i divorcuar, ndërsa dyshohet se vuante nga depresioni.
Njoftimi i policisë për ngjarjen:
Rreth orës 10:00 në krye të fshatit Bularat, shtetasi Kostandinos Kaçifa, rreth 35 vjeç ka qëlluar me armë zjarri në ajër.
Menjëherë në drejtim të vendit nga vinin të shtënat kanë shkuar shërbimet e Policisë të cilat ishin të dislokuara në qendër të fshatit pasi do zhvillohej aktivitet me rastin e festës së Greqisë.
Shtetasi Kostandinos Kaçifa sapo ka parë shërbimet e policisë që po afroheshin në drejtim të tij ka hapur zjarr me breshëri ndaj punonjësve të policisë duke rrezikuar jetën e tyre.
Fatmirësisht nga të shtënat nuk ka punonjës policie të plagosur, por vetëm është thyer xhami i mjetit të policisë.
Policia menjëherë ka rrethuar zonën ku përsëri ky shtetas ka hapur zjarr në drejtim të punonjësve të policisë që po e ndiqnin.
Shtetasi Kostandinos Kaçifa është futur në thellësi të fshatit ku forcat “Shqiponja” dhe shërbimet e tjera të Drejtorisë Vendore të Policisë vijojnë krehjen e zonës për të bërë të mundur kapjen e tij.
Në ndihmë të shërbimeve të Policisë së DVP Gjirokastër kanë shkuar forcat speciale Renea.
Shtetasi Kostandinos Kaçifa jeton në Greqi dhe ka rreth një javë që ka ardhur në Bularat.
