Kryeministri Edi Rama ka emëruar ministër të ri të Brendshëm një oficer karriere të ministrisë së Mbrojtjes duke shënuar rastin e parë në historinë e politikës shqiptare që ministri i Brendshëm merret jashtë partive qeverisëse.
Sandër Lleshi edhe pse i majtë nuk vjen nga rradhët e PS-së. Nga cv e tij mësohet se ai është një ushtarak i cili nuk ka qenë afër politikës derisa Kryeministri e mori si këshilltar të tij në kohën kur ministria e Mbrojtjes drejtohej nga Mimi Kodheli, e cila nuk flet fare kohët e fundit.
Që me ardhjen në pushtet të PS më 2013, ministër i Brendshëm u emërua Saimir Tahiri, një ndër 4-5 figurat më të rëndësishme të së majtës. Me largimin e tij për shkak të mbjelljes së Shqipërisë me kanabis dhe dyshimeve se edhe vetë u përfshi në trafikun e drogës, u zëvëndësua nga Fatmir Xhafaj.
Por edhe ky u largua për shkak të vëllait.
Nëse do të respektohej hierarkia e postit por edhe renditja në PS, posti nuk i takonte Sandër Lleshit, por Taulant Ballës për të vijuar tek Ulsi Manja dhe pse jo edhe te Alfred Peza që mori ditët e fundit detyra në sekretariatin e Partisë.
Rama duket qartë se nuk ka më besim të vendosë fatin e policisë dhe në fakt edhe fatin e pushtetit të tij brenda selisë së PS. Nga përvoja socialistët e nivelit të parë dhe të dytë kanë dalë me probleme.
Kush është Gjeneral Sandër Lleshi
Në periudhën 1996- 2000, gjeneral Lleshi ka qenë komandant i Kurseve në Akademinë e Mbrojtjes në Tiranë dhe më pas, për tre vjet të tjera, ishte komandant i Akademisë Ushtarake “Skënderbej”.
Në vitet 2003-2006 ka shërbyer si atashe i Mbrojtjes i Republikës së Shqipërisë në Gjermani. Sa i takon arsimit të tij në fushën ushtarake, ai fillon në periudhën 1978-1985 kur ka kryer shkollën e Mesme Ushtarake “Skënderbej” dhe Akademinë Ushtarake. Nga viti 1994 deri në 1999 ka kryer një sërë kursesh, si ai i gjuhës gjermane në Akademinë e Mbrojtjes Kombëtare në Vjenë (Austri); kurs i avancuar i gjuhës gjermane në Institutin Federal të Gjuhëve (Bundessprachenamt) në Gjermani; kurs i komandantit të Batalionit në Shkollën e Artilerisë Kundërajrore në Rendsburg, Gjermani; kurs i Shtabit të Përgjithshëm në Akademinë e Drejtimit në Hamburg, Gjermani dhe kurs i Sigurisë Europiane në Akademinë e Drejtimit në Hamburg, Gjermani. Në 2008-n, gjeneral Lleshi ka përfunduar Seminarin e Lartë Ekzekutiv në Qendrën për Studime të Sigurisë Europiane, George C. Marshall në Garmisch-Partenkirchen, Gjermani; Ndërsa në 2011-ën përfundoi Kursin e Lartë Ndërkombëtar për Menaxhimin e Mbrojtjes në Shkollën Pasuniversitare të Marinës në Monterey, Kalifornia, SHBA.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
