Haradinaj flet për “Babalen”: Nuk ekstradohet pa kaluar etapat ligjore

Kreu i qeverisë së Kosovës është pyetur gjatë vizitës së tij në Tiranë. Haradinaj ka dhënë dhe një sugjerim për politikën shqiptare, duke u shprehur se në fillimisht duhet të flasë gjykata dhe ligjet, e më tutje të ndërhyjë politika.

“Tek ne në Kosovë pushtetet janë të ndara.  Pra është shumë e vështirë për mua që t’u them sot a i është drejtuar ai institucioneve të Kosovës. Politika informohet vetëm kur një gjykatë ka marrë një vendim për ekstradim dhe atë vendim duhet që ta aprovojë një ministër. Kur vjen aprovimi i ekstradimit nga gjykata tek ministri i drejtësisë atëherë hyn politika. Deri atëherë është rast ligjor dhe nuk ndërhyn dot ekzekutivi.

Rasti i shtetasve turq të deportuar nga Kosova ka qenë një mësim i marrë me pasojat e veta kuptohet,  por ajo ka ndikuar që të respektohen mjaftueshëm krejt baza ligjore për procedurën në fjalë, pra kërkesa për azil për strehim ose për mbrojtje”– tha Haradinaj.

Kujtojmë se “Babalja” u bë i njohur pas publikimit të një video- përgjimi ku personi në fjalë (Albert Veliu) pretendonte se kishte incizuar me zë vëllain e Ministrit të Brendshëm Fatmir Xhafaj, teksa flisnin për trafik të drogës.

Disa javë më parë Albert Veliu ju drejtua Kosovës për azil politik pasi sipas tij në Shqipëri i rrezikohet jeta. Çështja e Babales u komplikua më tutje me përfshirjen në skenë të Fredi Alizotit, i cili thas përpara prokurorëve se zërin e Geron Xhafës, vëllait të Ministrit shqiptar të Brendshëm, e ka imituar ai në bashkëpunim me Babalen.

Vetë Veliu ka folur ditën e djeshme nga qendra e azilit në Prishtinë dhe është shprehur se Alizoti është blerë nga qeveria, ashtu siç edhe atij i janë ofruar para për t’u shitur.

Disa ditë më parë autoritetet shqiptare kërkuan lënien në burg dhe ekstradimin e Babales nga Kosova, por gjykata vendosi që ky i fundit të lirohej. Procedurat e ekstradimit dhe ato të azilit janë ende në proces