Një debat shterpë që po sulmon të vërtetën.
Ky është gjykimi i analistit Andi Bushati në lidhje me thirrjen e kryeministrit Rama për formalizimin e portaleve online në republikën e Shqipërisë.
I ftuar në rubrikën ‘Opinion’ në News24, analisti u shpreh se kjo sjellje e Ramës bëhet për të fshehur dhe sfumuar numrin e madh të skandaleve që po i plasin përditë në dorë qeverisë së majtë.
“Në shënjestër është e vërteta, jo portalet. Ishim në sfondin e skandalit të Xhisielës dhe Babales. Prokuroria ishte e përfshirë dhe policia dilte e zbuluar. Përballë publikut dilte kriminalizmi. Përballë këtyre Rama hap dy çështje të tjera. Formalizimi i portaleve mendoj se është për të shmangur skandalet. Me urdhër të Ramës del një listë me media online të cilat i kishin letrat në rregull, por dalin si jo në rregull. Ato media kanë marrë domenin, janë regjistruar. Ky është një debat shterpë për të shmangur çështjet e tjera. Shpifja tani dënohet dhe ne kemi ligje të rënda për të dënuar shpifjen. Ky debat është shterpë për të ndarë opinionin se kush janë shpifësit dhe kush janë në anën e të vërtetës”-tha Bushati.
