Sa herë opinioni shqiptar tronditet nga ngjarje të rënda kriminale, siç ishte masakra në Mat, vëmendja kthehet sërish tek kërkesa për rikthimin e dënimit me vdekje.
Përballë një kërkesë të tillë u gjend edhe shefi i opozitës, Lulzim Basha, mbrëmë në Mat.
Gazetari: Gjithë këto ngjarje që po ndodhin, a duhet të kthehet dënimi me vdekje?
Basha: Kjo është një çështje që u takon qytetarëve shqiptarë, unë personalisht jam i gatshëm që këtë pyetje t’ja shtroj popullit shqiptar, qoftë edhe si referendum, momentin që Partia Demokratike do të marrë përgjegjësinë për të qeverisur vendin.
Ekzekutimi i fundit është ai i vitit 1992 në Fier, ku dy vëllezër u vranë në mes të qytetit pasi kishin vrarë kur po grabisnin brenda në shtëpinë e viktimave, 5 pjestarë të një familje, përfshi një foshnje.
Shqipëria që nga viti 1995 kur u bë anëtare e Këshillit të Europës nuk ka dhënë dënime me vdekje dhe për veprat më të mëdha penale vendimi është shndërruar në “burgim të përjetshëm”.
Heqja globale e dënimit me vdekje është një nga objektiva kryesore të politikës së të drejtave të njeriut të BE-së.
Në vitin 2013, Ministrat e Jashtëm të 42 vendeve të botës, përfshirë dhe Shqipërinë, firmosën deklaratën kundër dënimeve me vdekje, por aktualisht 52 shtete kanë ende në fuqi ligjin e ekzekutimeve.
Bjellorusia është shteti i vetëm në Europë që ka në fuqi dënimin me vdekje.
Ndër 52 vendet, përfshihen edhe katër vende të industrializuara që vijojnë ende të ekzekutojnë kriminelët: SHBA, Japonia, Singapori dhe Tajvani.
Paketa antishpifje
Lidhur me paketën antishpifje të propozuar nga Rama, Basha tha se Kryeministri nuk ka për t’ia mbyll dot gojën as popullit, as opozitës, as medias së lirë.
Deklaratat i bëri pasi vizitoi familjarët e tre viktima në Mat, ku u shprehu ngushëllimet për humbjen e njerëzve të tyre. Shefi i opozitës vizitoi edhe të plagosurin nga kjo ngjarje, i cili po merr mjekim në spitalin e Burrelit.
