Seanca e sotme parlamentare është shoqëruar me tensione dhe pse e pranshme ishte vetëm mazhoranca.
Mesa duket deputetët socialiste, duke mos patur opozitën prezente, sulmojnë njëri-tjetrin. Teksa Erion Braçe po mbante fjalën e tij për ligjshmërinë fiskale të Federatës së Futbollit, ku i kërkonte ministrit Ahmetaj llogari për kontrollin financiar, shumë deputetë filluan të qeshnin.
Deputeti i PS, Bashkim Fino ka reaguar menjëherë pas kësaj situate, i cili duartrokiti Braçen gjatë fjalës së tij, në shenjë proteste. Ky veprim i tërheq vëmendjen ministrit të Jashtëm, Ditmir Bushati.
Në këto momente Fino nxehet dhe i kthehet ministrit:
“Ti mos qesh, por përgjigju Lulit dhe Saliut që të kanë akuzuar për vjedhje votash. Këtë nuk e ke bërë, prandaj ngrihu dhe përgjigju akuzave”, u shpreh deputeti Fino, ndërsa nuk është kursyer edhe me ministrin Ahmetaj, të cilit i’u drejtua duke i thënë: Ti bëj detyrën, atë bëj.
Kujtojmë se Braçe, akuzoi ministrin Ahmetaj se nuk i përgjigjet pyetjeve, për të cilat kishte kërkuar sqarime në Kuvend dhe se shumë institucione të mëdha kanë fituar imunitet fiskal dhe i shmangen detyrimeve ligjore, ku këtu nuk do të toleronte as Federatën shqiptare të Futbollit.
