Kryeprokurorja e përkohshme Arta Marku është vënë sërish në qendër të vëmendjes.
Këtë herë ajo është paditur nga prokurorja e Krimeve të Rënda, Sonila Muhametaj për shkak të transferimit të saj në Prokurorinë e Pukës.
Muhametaj ka depozituar padinë e saj në Gjykatën Administrative, ku kërkon shfuqizimin e urdhrit të dhënë nga Marku, për transferimin e saj në Pukë. Në padinë e saj Muhametaj pretendon se është shkelur ligji për statusin e prokurorëve, ndërsa shton se Marku ka tejkaluar kompetencat.
Përveç Muhametajt, Marku transferoi edhe dy prokurorë të tjerë, Olsian Çelën nga Prokuroria për Krime te Rënda, në Prokurorinë e Beratit dhe Besim Hajdarmatajn në Pogradec.
Lëvizjet në fjalë erdhën pas urdhrit të kryeprokurores së përkohshme për hetimin disiplinor të 10 prokurorëve që refuzuan gjykimin e çështjes ‘Shullazi’.
Po këta 10 prokurorë që janë në hetim disiplinor pasi refuzuan shortin për çështjen “Shullazi” kanë paditur prokuroren e Përgjithshme Arta Marku.
Ata e akuzojën Markun për shpërdorim detyre ndërsa kanë ngritur edhe padi civile për shfuqëzimin e urdhërit të Markut.
Hetimi disiplinor për 10 prokurorë të Krimeve të Rënda nisi kur ata refuzuan të bëhen pjesë e një shorti për caktimin e prokurori tjetër për pretencën e Emiljano Shullazit. Urdhri u dha nga Prokurorja e Krimeve të Rënda, Donika Prela.
