Kryetari i Partisë Demokratike ka reaguar në rrjetet sociale pas vendimit të prokurorisë për të kërkuar burg për ‘Babalen’ dhe kunatin e tij.
Në Twitter Basha shkruan se kjo pritej nga prokuroria e udhëhequr nga Rama. Basha thotë se me këtë akt, Rama i ka vënë zjarrin shtetit ligjor.
Prokuroria më herët kërkoi arrestimin e Albert Veliut, i njohur si ‘Babalja’ apo dëshmitari X, Fredi Alizotit, si dhe detyrim paraqitje për Jetmir Olldashin gazetarin që zhvilloi intervistën.
Reagimi i plotë
Kush priste dicka tjetër nga prokuroria Rama-Marku-Xhafa- Prela është vetëm naiv. Agron Xhafaj që i fshihej prej 5 vitesh drejtësisë me ndihmën e vëllait, u largua me urgjencë drejt Italisë, që të mos përballej me hetimin dhe akuzat që prokuroria e kapur i quan sot montim.
Sot çdo shqiptar e kupton më qartë se kurrë pse Edi Ramës i duhej prokuroria nën komandën e tij. Me aktin e sotëm Rama i ka vënë zjarrin shtetit ligjor. Tani nuk ka mbetur rrugë tjetër për të vënë banditët para përgjegjësisë përveç rrëzimit me çdo mjet të mafias në pushtet.
