Gjyqtari Sotiraq Lubonja, gjyqtar i Gjykatës së Apelit Korçë, doli sot para komisionit të Vettingut.
Gjatë procesit, për gjyqtarin rezultoi me probleme pjesa e deklarimit të pasurisë.
ILDKPKI thotë se deklarimi i tij është i pasaktë, nuk ka burime të ligjshme, ka fshehje pasurie dhe deklarim të rremë. Lubonja zotëron një shtëpi banimi në Korçë me dy kate, fituar me kontratë dhurimi 2/3 pjesë të saj.
Vlera e deklaruar për të është 2.5 milionë lekë, që janë të ardhura familjare. Në katet e banimit ka shtesa pa leje. Ka mospërputhje në dokumentacion dhe deklarimet e mëparshme për sipërfaqen e ndërtimit.
Vlera e ndërtimit të shtëpisë rezulton 6.3 milionë dhe Lubonja nuk ka pasur mjete të mjaftueshme financiare për ndërtimin e banesës në periudhën 1995-2002.
Gjithashtu nuk dihen se nga vinë disa shuma të mëdha të ardhurash.
Ai ka dhuratë në shumën 4 milionë lekë nga nëna e tij, e cila, sipas KPK-së, nuk ka pasur mundësi të bënte këtë dhuratë. Ndërkohë, vjehrri i ka bërë dhuratë një depozitë në bankë prej 25 mijë dollarësh.
Vendimi do të jepet me 8 tetor, teksa gjyqtari Lubonja ka kërkuar rikonfirmimin e tij në detyrë.
