Në arrestimin e Rrexhep Rrajës me akuzën e përndjekjes, prova kryesore kanë qenë tabulatet telefonike.
Këtë të diel, burime zyrtare nga policia njoftuan vënien në pranga të djalit të deputetit socialist të Krujës Rrexhep Rraja, pas një mase sigurie “arrest me burg” kërkuar nga Prokuroria e Krujës një ditë më parë dhe e firmosura nga gjykata e Rrethit. Gjyqtarja që firmosi vendimin për arrestimin e Rexhep Rrajës ishte Enkelejda Hoxha, ndërsa dosja u përgatit nga prokurorja Mirela Kapo.
“Specialistët e Komisariatit të Policisë Krujë në bashkëpunim me Forcat Operacionale të Drejtorisë Vendore të Policisë Durrës bënë kapjen me qëllim ekzekutimin e Urdhrit të Prokurorisë Krujë mbi bazën e Vendimit të Gjykatës së Rrethit Gjyqësor Krujë, nr.189 dt. 29.09.2018, e cila ka vendosur masën e sigurisë ‘Arrest me burg’ për shtetasin Rexhep Rraja 24 vjeç, banues në Krujë. Ai akuzohet për veprën penale “Përndjekja” parashikuar në nenin 121/a të Kodit Penal. Materialet i kaluan Prokurorisë së Rrethit Gjyqësor Krujë për veprime të mëtejshme”, njoftoi zyrtarisht Policia. Burime policore thanë se i riu është vënë në pranga në zonën e Rinasit.
Tabulatet telefonike, prova kryesore që çoi në qeli djalin e deputetit
Burime pranë grupit hetimor bënë me dije se ka një numër të madh thirrjesh telefonike dhe mesazhesh nga numri i Rexhep Rrajës drejt numrit të ish-të dashurës së tij Xhisiela Maloku, 6 muajt e fundit. Komunikime të atij lloji që për hetuesit përbëjnë elemente të konsumimit të veprës penale të përndjekjes.
Kjo ishte prova kryesore përveç dëshmisë së vajzës, nënës e motrës së saj marrë më herët gjatë kësaj jave nga Prokuroria e Krujës. Burime thanë se Xhiesiela është treguar e ndrojtur në dëshminë e saj dhe që në disa pika ka kontradikta me atë të së ëmës dhe motrës së saj. Sjellje kjo e vajzës që ka rënë pre e dhunës, pasi me gjasë ndihet ende e kërcënuar dhe e frikësuar nga ish i dashuri.
Prokuroria e Krujës ka nisur hetimet pas kallëzimit të Xhisiela Malokut në muajin Korrik. Siç është bërë me dije zyrtarisht, hetimet e para i bëri OPGJ Emiljano Nuhu, ish-nënkomisar i stacionit policor të Fushë-Krujës, i cili dosjen e mori nga oficeri tjetër i Policisë Gjyqësore Gentian Çitozi, sepse u zbulua se ky i fundit ishte kryer shkelje proceduriale.
Në shkelje u gjet edhe Emiljano Nuhu, njoftoi dy ditë më parë SHÇBA, pasi nuk ka kryer të gjithë veprimet që i ka deleguar prokurorja.
Denoncimi u tërhoq më pas nga vajza e cila u paraqit në komisariatin e Fushë-Krujës bashkë me Rrexhep Rrajën, avokatin e saj dhe psikologen
Pavarësisht tërheqjes së kallëzimit, hetimet vijuan nga Prokuroria e Fushë-Krujës. Pasi ngjarja u bë publike me akuzat e Emiljano Nuhut, prokuroria ka thelluar hetimet.
Ndërkohë, një hetim kryesisht ka nisur nga organi qendror i akuzës më Tiranë për pretendimin e Emiljano Nuhut, se zyrtarë të lartë të PS-së si kreu i grupit parlamentar Balla, kryebashkikau i Krujës Artur Bushi dhe deputeti Rraham Rraja kanë qenë prezent në zyrën e Nuhut në stacionin policor të Fushë-Krujës kur ky i fundet është kërcënuar me pistoletë nga vëllai i Rrahman Rrajës.
SHÇBA njoftoi gjithashtu se ka nisur një hetim nga ana e saj lidhur me ngjarjen. Dy ditë më parë, drejtoresha e SHÇBA, Anila Trimi, teksa bëri me dije rezultatet e hetimeve paraprake, tha se personat e përmendur nga Nuhu nuk rezultojnë të kenë qenë prezent në stacionin e policisë as ditën kur ai pohon e as ndonjë ditë tjetër më pas./Panorama
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
