Ndonëse gjithë vëmendja është përqëndruar tek fakti nëse Taulant Balla ka qënë apo jo në komisariat, në momentin e kërcënimit të ish-oficerit Nuhu, gazetarja Rudina Xhunga sjell në vëmendje vajzën për të cilën ngre pyetjen ” Po me vajzën çfare do të bëhet”?
Në fokus të reagimit të saj ajo ka vendosur vajzën e cila është më e prekur nga gjithë kjo histori.
Xhunga thotë se vajza është e pambrojtur në këtë ngjarje, ndërsa ndalet te fakti se raste të tilla ndodhin për shkak të problemeve në drejtësi.
Reagimi i Rudina Xhungës:
Po me vajzën çfarë do bëhet?
Vajza është e pambrojtura në këtë dramë. Është ajo që u dhunua, u gjet pre e lehtë, se nuk ka babanë, ështe vajzë fshati, jeton vetëm me një moter e nënën, u rrëmbye,shpëtoi pa e vrarë, se terhoqi kallëzimin dhe pastaj u mor serish me dhunë të mohonte kallëzimin.
Se është e thjeshtë të dhunosh një të pambrojtur e pastaj ta bësh këtë edhe publikisht.
Por çështja është kur i hap derën të fortëve, kur bëhesh me të fortin, kundër të dobtit, nesër e ke radhen ti.
Ngjarja nuk ndodhi në Siri, ndodhi në Krujë. Dhe çfare ndodh kaq afer, të vjen nesër te dera.
Do dalë nesër një i fortë edhe për ty, diku po të pret, se çfare bën, gjen.
E gjen dhe atëhere pyete veten sa të duash, si u bë ky vend kështu?
U bë , se nuk fole ti. U bë se kujtoje që ishin punë kurvash e kriminelësh, punë pozite dhe opozite.
Jo, ishin dhe janë punë drejtësie dhe padrejtësie. Punë shteti dhe antishteti, punë të fortësh qe jua japim ne fuqinë ne, me heshtjen tonë.
Pastaj ata kujtojnë se janë edhe të mençur.
Epo kur të vijnë deri tek ti, mos prit të vijë kush në ndihmë.
Se kështu bëre edhe ti kur një vajzë e re nga fshati, u rrëmbye, dhunua publikisht dhe nuk e lanë të vuajë as në heshtje se duhej të tregonte se nuk qe Balla në komisariat.
Ore njerëz, keni vajza ju, gra, motra, nena? Vërtet besoni se nuk e kanë radhen ato, nëse kjo klimë kthehet në normalitet?
Une sot jam me Xhiselën, që as emrin nuk ia mësova mirë, se ia thane të gjithë ndryshe, ngaqë më e pakta ju interesonte emri saj.
Epo mua ajo me intereson, vajza e pambrojtur, për të vetmen që nuk do t’ia dijë kush, në këte histori të ndyre dhe të ligë.
