Rastet e shpërndarjes dhe shitjes së drogës në shkolla nuk janë të pakta. Vetëm para pak orësh u raportua për arrestimin e një 22 vjeçari i cili u kap duke shpëndarë lëndë narkotike në shkollat e Tiranës, ndërkohë që ende janë duke u hetuar dhe punuar për ndalimin e rasteve të tjera.
Pikërisht, kjo temë ka qënë në fokus të bisedës në televizionin Ora News, ku deputetja e LSI, Kejdi Mehmetaj ka qënë e ftuar.
Deputetja ka disa herë që ngre shqetësimin lidhur me këtë problematikë e cila është me rëndësi për mbarëvajtjen e nxënësve në shkolla.
Kejdi shprehet se situata ka shkuar në një pikë ku duhet ndërhyrje e menjëhershme ose i gjithë brezi do të marrë për keq.
“Në një gjimnaz të Tiranës apo dhe në ato të rretheve ti mund të gjesh cigaren e hashashit më shpejt sesa mund të gjesh një shkumës. Duhet të jetë policia, prokuroria, ministria e arsimit, psikologët, duhet të jenë prindërit, duhet të ketë një reagim të menjëhershëm mbi këtë fenomen,” tha Mehmetaj.
Sipas saj, ky është një shtet i kapur, me një kryeministër që nuk është mbi palët por është pjesë e gjithë këtij sistemi të ngritur me krimin e organizuar. Kryeministri i ka të gjitha mjetet në dispozicion që të mos lërë situatën ti rrëshkasë nga dora, thotë deputetja, se i bie të flasim për një njeri të paaftë që nuk e meriton të jetë specialist në një zyrë shteti dhe jo më të jetë kryeministër.
