Përpara largimit nga Shqipëria, ambasadori amerikan Donald Lu ka zhvilluar një takim edhe me Prokuroren e Përgjithshme, Arta Marku.
Në takim ishin të pranishëm edhe zëvendësambasadorja e re Leyla Moses-Ones si dhe zyrtarë të OPDAT-it.
Zyra e shtypit të Prokurores Marku ka zbardhur takimin, ku ndër të tjera thuhet se “Prokurori i Përgjithshëm dhe zyrtarët amerikanë theksuan rëndësinë që ka bashkëpunimi mes Prokurorisë dhe agjencive ligjzbatuese të Shteteve të Bashkuara”.
Po ashtu Ambasadori Lu vlerësoi maksimalisht rolin, gatishmërinë dhe përgjegjshmërinë e Prokurorit të Përgjithshëm Arta Marku, në një periudhë të rëndësishme për zbatimin e legjislacionit të ri të reformës në drejtësi.
Prokurorja e Përgjithshme i uroi punë të mbarë zotit Lu në detyrën e re dhe çmoi rolin e tij dhe të ambasadës së Shteteve të Bashkuara për promovimin, hartimin dhe miratimin e reformës në drejtësi.
Njëkohësisht, ajo i uroi mirëseardhjen në Shqipëri zëvendësambasadores së re znj. Leyla Moses-Ones, duke theksuar vendosmërinë për thellimin e punës së përbashkët për të ardhmen, në luftë kundër kriminalitetit.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
