Ulsi Manja, kreu i Komisionit të Ligjeve e ka cilësuar si montazh audio-përgjimin e bërë publike dje ku dëgjohet nënkryetari i KQZ, Denar Biba duke shantazhuar gjyqtarin shqiptar të Strasburgut, Ledi Bianku.
Në një prononcim për mediat, Manja ka dhënë shpjegime lidhur me audiopërgjimin e publikuar.
”Hajde shantazh hajde, një material që flasin në kafe në 2014-ën dhe me fjalë të shkëputura, ku u bëka fjalë për shantazh këtu? Ledi Bianku, miku i Denar Bibës s’ka asgjë në dorë në Strasburg. Kjo është e verifikueshme. Si ka mundësi që e ka xhiruar në 2014-ën dhe paska heshtur për katër vjet?” shprehet Manja.
Ndërkohë, kujtojmë se gjykatësi shqiptar në Strasburg e ka konfirmuar shantazhin i pyetur nga Exit.al media që publikoi audio-përgjimin.
Ledi Bianku, gjyqtari shqiptar në Strasburg, ka pranuar bisedën si dhe ka konfirmuar se e ka informuar kryetarin e atëhershëm të gjykatës së Strasburgut, duke i cilësuar mesazhet e të dërguarit të qeverisë si ndikim të papërshtatshëm.
Madje gjyqtari Ledi Bianku e raportoi pranë kryetarit të gjykatës në atë kohë, duke e cilësua bisedën në telefon si një ndërhyrje të paligjshme në punën e tij.
