Ish prokurori i përgjithshëm Adriatik Llalla është vënë nën hetim nga Prokuroria e Krimeve të Rënda menjëherë pas dorëheqjes së tij nga sistemi i drejtësisë.
Gjykata e Apelit për Krimet e Rënda po merret ende me shqyrtimin e verdiktit të datës 20 korrik, ku u vendos sekuestroja preventive ndaj disa pasurive të ish-prokurorit të përgjithshëm Adriatik Llalla.
Por sot kanë nisur seancat dhe beteja ligjore për ish-prokurorin.
Llala ka ankimuar vendimin e gjykatës së shkallës së parë për sekuestrimin e pasurive të tij, të cilat arrijnë vlerën e 1 miliard lekëve.
Sipas Top-Channel, gjykata është inicuar pas një ankimimi të depozituar nga avokati mbrojtës i Llallës, zoti Sokol Hazizaj, por ndërkohë procesi po zhvillohet në mungesë të avokatit mbrojtës, për sa kohë avokati ndodhet me pushime.
Në këto kushte, gjyqtari i gatshëm dhe që i ka rënë shorti për shqyrtimin e kësaj çështjeje, ka kërkuar asistencën e një avokati kryesisht, për të cilin ka qenë e vështirë të gjendet, për sa kohë shumica e avokatëve që gjenden në listën e Gjykatës së Krimeve të Rënda, janë gjithashtu me pushime.
Për këtë arsye seanca u shty për në orën 15:00. Aktualisht akuza përfaqësohet në shkallën e dytë nga prokurori Bujar Sheshi, ndërsa seanca drejtohet nga gjyqtari Idriz Mulkurti.
