Atleti shqiptar i kërcimit së gjati, Izmir Smajlaj nuk ia doli të futet në zonën e medaljeve, pasi u rendit vetëm në vendin e gjashtë, në kampionatin europian që po zhvillohet në Berlin të Gjermanisë.
Ai regjistroi si kërcim më të mirë atë 7.99 metra, por me foto dhe video tregoi se rezultati i provës së tretë është manipuluar nga gjyqtarët e pistës.
Në fakt kjo provë fillimisht u dha 7.47 metra dhe më pas u finalizua në 7.73 metra, por pamjet video dhe foto, tregojnë qartë se kërcimi i atletit shkodran ka qenë mbi 8 metra.
Smaljaj deklaroi se së bashku me Federatën Shqiptare të Atletikës, kanë denoncuar këtë gabim dhe presin vendimin final të IAAf, që po bën verifikimet përkatëse.
Kujtojmë që atleti shkodran u shpall kampion Europe vitin e kaluar, në garat me salla të mbyllura, në Beograd të Serbisë, me kërcimin më të mirë 8.08 metra.
Në foto është momenti që shkaktoi zemërim në delegacionin shqiptar të atletikës gjatë garimit të Izmir Smajlajt në kërcimin së gjati në Evropianin që po zhvillohet në Berlin.
“Do t’ua dokumentoj të gjithë mediave shqiptare se çfarë ka ndodhur me të vërtetë me rezultatin e Izmirit. Në kërcimin e tretë, ka kërcyer në kufirin e 8 metrave dhe duhet të ishte në mënyrë absolute finalist. Fillimisht u dha nëj rezultat më i dobët dhe më pas e korrigjuan, por sërish nuk na dhanë hakun”, tregoi Ruli.
Ruli deklaroi gjithashtu se e gjithë kjo ishte një turp i madh dhe se gjyqtarët e garës u munduan ta mbulonin, duke deklaruar se ka pasur ankesa edhe nga Federata të tjera.
“Për të mos marrë përsipër gjyqtaria turpin apo gabimin, tha se ka ankesë nga Suedia, Polonia, Ukraina dhe Shqipëria. Unë do ta quaja një turp, që atletit tonë iu hoqën pretendimet për medalje”, deklaroi Ruli.
Në fund presidenti i Federatës Shqiptare të Atletikës deklaroi se Smajlaj do të marrë pjesë në evenimentin e përvitshëm që zhvillohet në nder të rekordmenit evropian të kërcimit të gjati, Robert Emmiyan, ku shkodrani do të kërkojë të vëjë nderin në vend për padrejtësite që iu bënë në këtë evropian
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
