Rreth 70 % të pronave të sekuestruara sipas ligjit antimafia, që dyshoheshin se kishin burim krimin e organizuar, u janë kthyer mbrapsht të zotëve pas procese gjyqësore. Për Agjencinë e Administrimit të Pasurive të Sekuestruara ky është një problem. Po ashtu dhe tejzgjatjeve e gjyqeve. Që nga sekuestrimi deri në konfiskimin final të këtyre pasurive, me vendim të formës së prerë të gjykatës, kalojnë vite. Gjatë të cilave Agjencia duhet të mirëmbajë dhe menaxhojë pasurinë e konfiskuar, madje të kujdeset edhe për personat që janë punësuar në to.
“Problemi është te gjykatat, sigurisht. Shpresojmë që me përfundimin e reformës në drejtësi, raporti i vendimeve të përmbyset. Numri I pasurive që shkojnë në konfiskim të rritet, pasi deri më tani kanë qenë në masën 30%. Procesi zakonisht zgjat shumë, 2-5 vite. Proces i cili dëmton Agjencinë”, thotë Artur Kala, kreu i Agjencisë së Administrimit të Pasurive të Sekuestruara gjatë një interviste për Klan Plus.
Deri më tani vlera e pasurive që i janë sekuestruar krimit, shkon mbi 32 milionë euro.
“Gjatë gjashtë mujorit të parë të 2018-s janë sekuestruar 145 pasuri”, sqaron Kala
Deri në vendimin e konfiskimit, pronat mund të jepen me qira nga Agjencia ose të vendosen në shërbim të komunitetit. Pas vendimit të formës së prerë ato mund të shiten. por deri më sot askush nuk ka guxuar t’i blejë.
“Nuk është shitur asnjë pasuri. Kjo për shkak të prejardhjes së tyre dhe besoj dhe të çmimit, që është ai i tregut. Në përgjithësi pronat kanë kaluar në përdorim apo pronësi të institucioneve si Ministrisë së Mjedisit, pushtetit lokal, Policisë, Prokurorisë, Qendrës Kombëtare të Viktimave të Trafikimit”, thotë Artur Kala.
Por çfarë ndodh me paratë e konfiskuara nga llogaritë e kriminelëve apo financuesve të terrorizmit ?
“Kemi krijuar 2 herë fondin e posaçëm. Jepet për policinë dhe prokurorinë për forcimin e kapaciteteve dhe përmirësimin e hetimit. Po ashtu i jepet dhe OJF-ve dhe qendrave për trajtimin e viktimave të trafikimit”, vijon kreu i Agjencisë, Kala.
Nga 354 pasuri që Agjencia ka në menaxhim , 62 janë të konfiskuara dhe kanë kaluar zyrtarisht në pronësi të shtetit shqiptar, ndërsa 253 presin vendimin e gjykatës. /Klan Plus
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
