Komisioni Evropian pritet të dalë sot me përfundimin se Kosova i ka përmbushur të gjitha kushtet nga procesi i dialogut për liberalizim vizash.
Express shkruan se një veprim i tillë i Komisionit Evropian ishte pritur shumë më herët.
Presidenti i Kosovës, Hashim Thaçi, kryetari i Kuvendit Kadri Veseli, kryeministri Ramush Haradinaj dhe zëvendëskryeministrat Fatmir Limaj, Behgjet Pacolli e Dardan Gashi do të takohen sot në Bruksel me përfaqësuesen e lartë të Bashkimit Evropian, Federica Mogherini
Krerët institucionalë të Kosovës do të takohen me përfaqësuesen e lartë për Politikë të Jashtme të Bashkimit Evropian, Federica Mogherinin, me të cilën do të diskutojnë për çështjen e fazës finale të dialogut me Serbinë, për liberalizimin e vizave për Kosovën, si dhe për agjendën evropiane të Kosovës.
Kujtojmë se Kosova me ratifikimin e Demarkacionit me Malin e Zi, përmbushi kushtin kryesor të vendosur nga Bashkimi Evropian për liberalizimin e vizave.
Kusht tjetër për lëvizjen e lirë të qytetarëve të Kosovës nëpër zonën Schengen ishte edhe luftimi i krimit të organizuar dhe korrupsionit, aspekt në të cilin Kosova edhe sipas raportit të progresit ka arritur përparime.
