Një 52 vjeçar mbante kapsolla, lëndë plasëse dhe fitil zjarrpërcjellës. Ai ka rënë në prangat e policisë Dibër.
Sipas policisë gjatë kontrollit të ushtruar, 52 vjeçarit i janë gjetur të fshehura të gjitha materialet e lartpërmendura në magazinën e lokalit të tij në qytetin e Peshkopisë.
Njoftimi i Policisë, Dibër
Vijojnë kontrollet nga strukturat e policisë për parandalimin e ngjarjeve kriminale.
Sekuestrohen lëndë plasëse, fitil zjarrpërcjellës dhe kapsolla detonatore
Arrestohet në flagrancë poseduesi
Në vijim të punës për parandalimin e ngjarjeve kriminale, parandalimin e konflikteve dhe goditjen e paligjshmërisë, strukturat e policisë së Dibrës kanë ushtruar kontrolle të befasishme në disa ambiente ku në një lokal u gjetën dhe u sekuestruan lëndë plasëse, kapsolla e fitil zjarrpërcjellës.
Nga Specialistët për Hetimin e Krimit në Komisariatin e Policisë Dibër, u arrestua në flagrancë shtetasi:
Nj. P., 52 vjeç, banues në Peshkopi.
Arrestimi i tij u bë pasi gjatë kontrollit të ushtruar në magazinën e lokalit të tij në qytetin e Peshkopisë, iu gjetën të fshehura dhe iu sekuestruan në cilësinë e provës materiale:
7 kallëpe me lëndë plasëse ( 400 gr. secili), gjithësej 2 kg e 800 gr.
58 copë kapsolla detonatore.
Si dhe rreth 4 metër fitil zjarrpërcjellës.
Materialet hetimore do t’i referohen Prokurorisë Pranë Gjykatës së Shkallës së Parë Dibër, për veprën penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 i Kodit Penal.
