Tre mjekë të QSUT-së janë vënë nën akuzë për mjekimin e pakujdesshëm të 35-vjeçares Aida Çajka, e cila humbi jetën para një viti në maternitetin “Koço Gliozheni”. Sipas prokurorisë, në akuzë janë vendosur mjekët e QSUT-së dhe lirohen nga akuza ata të maternitetit.
Tre mjekë të Qendrës Spitalore Univesitare Nënë Tereza janë vënë nën akuzë nga Prokuroria e Tiranës, për mjekimin e pakujdesshëm të 35-vjeçares Aida Çajka, e cila para një viti ndërroi jetë në maternitetin “Koço Gliozheni”.
Besiana Hysi, Zamira Hysenaj dhe Olvis Petre akuzohen se nuk kanë treguar kujdesin e duhur shëndetësor ndaj 35-vjeçares, e cila mbërriti me urgjencë në QSUT, pasi ishte dërguar atje nga mjekët e maternitetit, ku u paraqit fillimish për lindje.
Pas qendrës spitalore, Çajka u dërgua në Sanatorium, për t’u rikthyer sërish në maternitet, ku ndërroi jetë.
Mjekoligjorët përcaktuan si shkak të vdekjes çarjen e enëve të gjakut që furnizojnë shpretkën dhe fillimisht nën akuzë u vunë 3 mjekët e maternitetit.
Ndërkaq, seanca e parë gjyqësore për 3 mjekët e QSUT-së, do të jetë më 17 korrik.
Aida Çajka ishte nënë e 2 fëmijëve dhe humbi jetën bashkë me foshnjën e palindur, shtatorin e vitit të kaluar./ORA/
