Edhe pse Edi Rama kërkoi që prefekti i Kukësit të mos e firmosë vendimin e dekorimit, duke u distancuar nga vendimi, kjo nuk ka mjaftuar për të bindur partinë demokratike.
”Që të tregojë distancim të vërtetë prej vendimit kriminal, Edi Rama duhet ta shkarkojë sot Kryetarin e Bashkisë së Hasit’‘, kështu thuhet në reagimin e partisë demokratike.
Në rrjetin facebook, përmes një statusi të shpërndarë, partia demokratike thotë se nuk mund të ketë justifikim për Edi Ramën ndaj vendimit kriminal të dekorimit të Mazrekut.
Sipas tyre, kryeministri ishte në dijeni të propozimit të kryebashkiakut të tij dhe ai e ka madje në dorë shkarkimin e tij sic pati mundësinë për të përjashtuar nga partia socialiste, këshilltarët e Kukësit që morën pjesë në protestë.
Reagimet e herëpashershme të partisë demokratike vijnë pas dekorimit të Gafur Mazrekut si ”qytetar nderi” i Hasit.
Reagim i Partisë Demokratike
Asgjë nuk mund ta justifikojë Edi Ramën në vendimin kriminal për të dekoruar njeriun që qëlloi me armë brenda sallës së Parlamentit Liderin e Lëvizjes Studentore Azem Hajdari!
Firma e prefektit nuk është zgjidhja! Është vetëm një mjet që Edi Rama të mos marrë përgjegjësi!
Edi Rama nuk mund të lajë duart si Ponc Pilati dhe të fshihet pas Prefektit, sepse Kryetari i Bashkisë së Hasit është i tij, se ai ishte në dijeni të propozimit të kryebashkiakut të tij dhe, mbi të gjitha, Edi Rama ka në dorë ta shkarkojë atë.
Që të tregojë distancim të vërtetë prej vendimit kriminal, Edi Rama duhet ta shkarkojë sot Kryetarin e Bashkisë së Hasit, përfaqësues i Partisë Socialiste, i zgjedhur nga Edi Rama.
Të ruajë të njëjtin standard si me këshilltarët e Kukësit që morën pjesë në protestë, të cilët, në pamundësi për t’i shkarkuar, i përjashtoi nga Partia Socialiste.
Derisa të bëjë këtë akt të vërtetë distancimi, Partia Demokratike e konsideron Edi Ramën si urdhëruesin e dekorimit të atentatorit të Azem Hajdarit, për të cilin do të mbajë përgjegjësi personale!
