Autori i vrasjes së prindërve të tij ka deklaruar në momentin e arrestimit se do të vriste edhe vëllain dhe dajën e tij. 26-vjeçari Qemal Sela, pak orë pas kthimit nga Anglia, ekzekutoi me breshë-ri kallashnikovi nënën dhe babain të ndodhur në lagjen “Llixha” të qytetit të Peshkopisë. Një javë pas krimit të dyfishtë që tronditi Peshkopinë, dalin detaje të reja në lidhje me 26-vjeçarin Qemal Sela.
Bëhet fjalë për bashkëshortët Flamur dhe Zeqimete Sela, përkatësisht 55 dhe 50 vjeç, mbi të cilët i riu zbrazi një karikator me plumba. Vrasja ndodhi për motivin se ai akuzonte prindërit e tij se kishin prishur të gjitha paratë që ai kishte dërguar nga Anglia përgjatë 7 viteve emigracion për të ndërtuar 2 hotele që shërbenin për personat që frekuentojnë llixhat e Peshkopisë.
Mësohet se ndërhyrja në kohë e patrullës së policisë, e cila ishte afër hotelit 4-katësh ku u vranë burrë e grua, ka shmangur vrasjen e dy familjarëve të viktimave. Qemal Sela ka debatuar ashpër me të atin sapo ka mbërritur në aeroportin e Rinasit. Sipas bluve, emigranti ka refuzuar të udhëtojë me babain që kishte dalë ta priste në aeroport me një taksi të prenotuar që në Peshkopi.
