VIDEO/ Basha: Këta tre persona po pengojnë negociatat

“Rama, Tahiri, Xhafaj janë sot pengesat kryesore të integrimit në Bashkimin Europian dhe për hapjen e negociatave të anëtarësimit”.

Kështu u shpreh sot kreu i PD-së Lulzim Basha i cili ju referua mesazhit të zv/kryetarit të Grupit Parlamentar CDU/CSU, i cili dje u shpreh se Shqipëria nuk ka plotësuar asnjë kusht për hapjen e negociatave dhe se strategjia e Ramës për të gënjyer me fasadën e rreme ka dështuar.

Sipas Bashës, Wadephul renditi 7 kushte për negociatat, mes të cilave zhbllokimin e Gjykatës Kushtetuese dhe krijimin e SPAK, luftën ndaj trafikut të drogës, reformën zgjedhore, kapjen e peshqve të mëdhenj si Tahiri, largimin e Xhafajt.

Deklarata e plotë e kryetarit të Partisë Demokratike, Lulzim Basha

Të dashur bashkëqytetarë,

Kur na ndajnë vetëm 2 javë nga vendimi për hapjen e negociatave për anëtarësimin e Shqipërisë në familjen europiane, mesazhet e Europës po bëhen çdo ditë e më të qarta.

Hapja e negociatave dhe integrimi i Shqipërisë në BE nuk është proces reklamash dhe lobimesh personale. Është një proces i vërtetë i veprimit dhe sjelljes si europiane.

Strategjia e Edi Ramës, përmes krijimit të një fasade të rremë që gjërat në Shqipëri shkojnë mire, ka dështuar. Fasada ka rënë. Qeveria është lakuriq para botës.

Sot nuk ecin më gënjeshtrat, mashtrimet, kërcënimet dhe fajësimet e të tjerëve.

Mesazhet e djeshme të zv/kryetarit të Grupit Parlamentar CDU/CSU se Shqipëria nuk ka plotësuar asnjë kusht për hapjen e negociatave, se Tahiri është peshk i madh dhe Xhafaj duhet të largohet, janë pasqyra e vërtetë e gjendjes në Shqipëri dhe prova se gënjeshtrat nuk ecin.

Numri dy i Kancelares Merkel në Grupin Parlamentar CDU/CSU, Dr. Johann David Wadephul, Zv. Kryetari i Grupit Parlamentar CDU/CSU ne Bundestag, përgjegjës për politikën e jashtme, të sigurisë dhe Këshillin e Europës, dhe Kreu i Grupit te Punës për Ballkanin Perëndimor foli qartë kur deklaroi se:

1. Duhet të zhbllokohet Gjykata Kushtetuese dhe Gjykata e Lartë dhe të krijohet SPAK.
2. Është rritur trafiku i të gjitha drogave.
3. Reforma zgjedhore kusht i rëndësishëm për hapjen e negociatave.
4. Emërimet në administratë, janë në shkelje të ligjit.
5. Peshqit e mëdhenj janë të paprekur, në rrjetë kanë rënë vetëm peshq të vegjël.
6. Tahiri është peshk i madh. Çështja e tij është një pengesë reale për hapjen e negociatave.
7. Fatmir Xhafaj është në konflikt interesi dhe vazhdimi i tij në detyrë bie ndesh me standardet europiane të sundimit të ligjit, rrjedhimisht dhe mos largimi i tij është pengesë për hapjen e negociatave.

Wadephul tregoi se e vetmja gjë që na shpëton është e vërteta.

Zgjedhja që kemi sot përpara nesh është e qartë:

Nëse duam Europën, Samir Tahiri duhet të jetë aty ku e kanë vendin trafikantët dhe pushtetarët e lidhur me trafikantët.

Nëse duam Europën Fatmir Xhafaj duhet të largohet.

Nëse duam Europën, qeveria duhet të luftojë dhe jo të mbrojë korrupsionin, krimin dhe trafikantët.

Nëse duam Europën, duhet të bëjmë reformë zgjedhore dhe të ndalim njëherë e përgjithmonë shitblerjen e votës dhe manipulimin e zgjedhjeve.

Rama, Tahiri, Xhafaj janë sot pengesat kryesore të integrimit në BE.

Është e qartë se çfarë duan shqiptarët:

Shqiptarët duan Europën. Shqiptarët duan hapjen e negociatave.

Ndaj është urgjent largimi i Fatmir Xhafës dhe dhënia fund e mbrojtjes politike që Rama po i bën Saimir Tahirit. Zgjedhja është e shqiptarëve dhe jo e Edi Ramës. Edi Rama duhet t’i bindet vullnetit të njerëzve ose të largohet.

/DRONI.al/