Arratisja nga salla e gjyqit e 28-vjeçarit Mikel Kasaj e cila ka ndodhur paraditen e kësaj të mërkure në gjykatën e Vlorës ka bërë që prej disa orësh, policia të blindojë qytetin dhe është vënë në ndjekje të tij, për ta kapur.
I riu ia mbathi me vrap pasi ishte pa pranga në duar, sapo mësoi dënimin e dhënë nga gjyqtari me 3.4 vite burg.
Sipas mediave lokale, Policia po ushtron kontroll në çdo mjet edhe pse shiu po bie me intensitet.
Ndërkohë nga ana e saj, Prokuroria e Vlorës mbi bazën e informacionit të prokurorit të çështjes Saimir Smaka filloi veprimet hetimore për arratisjen nga gjykata e Vlorës të shtetasit Mikel Kasa.
Hetimet filluan nga prokurorja dhe oficeri i Prokurorisë që janë të gatshëm.
Janë shoqëruar tre punonjësit e policisë së burgjeve që kanë pasur detyrën e shoqërimit të të arrestuarit dhe do të kryhet arrestimi i tyre.
