Një grup të burgosurish shqiptarë i vuri flakën një qelie në burgun e Marassit në Genova, por ndërhyrja e menjëhershme e policisë shmangu pasojat e rënda.
Sipas autoriteteve të burgjeve, autorët janë ‘shtatë të burgosur shqiptarë tashmë të njohur për akte të tjera të ngjashme’.
Njoftimi thotë se zjarri u vu në shenjë proteste ‘kundër një kontrolli special në qeli që solli zbulimin e një celulari dhe të një cigareje hashash’.
‘Pasi i vunë zjarrin tavolinës dhe objekteve të tjerë, të burgosurit hodhën bombola të ndezura në korridor, duke e mbushur me tym, dhe sikur të mos kishim hapur të gjitha dritaret mund të ishte bërë shumë e rrezikshme’, thotë policia.
Një nga shtatë të burgosurit është i dënuar për vrasje në tentativë.
