Ish ministri i Drejtësisë, Gazmend Bardhi, i ftuar në emisionin “Opinion”, ka deklaruar se prokuroria nuk e ka kontaktur Partinë Demokratike, pas publikimit të një audio përgjimi, i cili sipas kësaj partie, është një bisedë e një trafikanti me vëllain e ministrit të brendshëm, Fatmir Xhafaj. Bardhi u shpreh se prokuroria nuk ka kërkuar provat nga PD, sepse është nën urdhrat e Ramës dhe Xhafajt.
Bardhi: Sot që flasim prokuroria është nën urdhrat e Xhafajt.
Fevziu: A ju ka kontaktuar prokuroria?
Bardhi: Nuk na ka kontaktuar. Nuk ka zbatuar ligjin anti mafia, nuk ka hetuar Fatmir Xhafajn. Ju e dini si ka dalë informacioni. Prokuroria nëse nuk bën teatër, kryen procedura zyrtare. Ministri ka përgjegjësi ligjore, ministri i brendshëm ka për detyrë të godasë trafikun e drogës. Nuk presim që Xhafaj ta bëjë këtë për vëllain e tij. Ai e di që vëllai bën trafik, është i dënuar dhe është subjekt i ligjit Antimafia.
