Ish-ministri i Brendshëm Saimir Tahiri është parë disa herë në ballkon me cigare në dorë, me telefon në vesh në banesën e tij në Kodra e Diellit por nuk është gjetur të ketë shkelur vendimin e Gjykatës së Krimeve të Rënda që e ka lënë atë me masën e sigurisë arrest shtëpiak.
Mediat televizive e mbikqyrën sot gjatë gjithë paradites në afërsi të banesës dhe Tahiri ka dalë vetëm deri në ballokon duke mbajtur edhe një letër në dorë.
Prokuroria thotë se kërkesën e saj për arrest të Tahirit e ka bazuar në prova të reja sic janë letër-porositë e mbërritura nga Greqia dhe kanë të bëjnë me dyshimet se ai është takuar me një nga vëllezërit Habilaj. Një fakt i ri sipas akuzës janë dhe dëshmitë e reja të marra këto kohë në Shqipëri dhe jashtë vendit.
Dy javët e fundit, në Prokurori dhanë dëshminë e tyre dy nga njerëzit më të afërt të Tahirit, shoferi Gentian Ceka dhe truproja Elvis Rexha. Gjithashtu u pyetën disa banorë të fshatit Gjorm, nga ku ka origjinën edhe Nazer Seiti, një nga personat e rëndësishëm te grupit të “Habilajve”.
Por mbrojtja e Tahirit pretendon të kundërtën duke sqaruar se prokuroria ka të njëjtat prova të paraqitura në Kuvend dhe nuk ka asnjë element të ri në kërkesën e bërë. Pritet që Saimir Tahiri të dalë para Gjykatës së Krimeve të Rënda të martën për verifikimin e masës së sigurisë. Në seancë, përveç verifikimit ai do të merret edhe në pyetje. Pala mbrojtëse ka bërë të ditur se do ta apelojë masën e arrestit të shtëpisë, e të njëjtën gjë ka paralajmëruar edhe prokuroria.
