Një 25-vjeçar u vetëvra duke u hedhur nga ballkoni, pasi masakroi me thikë babanë dhe nënën në shtëpinë ku jetonin prej 10 ditësh në Tiranë.
Burrë e grua, që u masakruan me thikë nga i biri mbrëmjen e së shtunës, i janë nënshtruar dje një ndërhyrjeje kirurgjikale në Spitalin e Traumës.
Babai i viktimës, 66-vjeçari Ermir Skrapari, ndodhet ende në gjendje të rëndë dhe po mbahet në reanimacion.
Ai është goditur disa herë në bark dhe në qafë nga i biri. Mjekët thonë se goditjet në bark i kanë dëmtuar disa organe.
Ndërsa më e stabilizuar paraqitet gjendja e nënës së 25-vjeçarit, shtetases Anila Skrapari, 55 vjeçe.
Ajo ka marrë një goditje në qafë e megjithëse plaga ka qenë e thellë, mjekët kanë mundur të ndërhyjnë në kohë duke bërë që të ndërpritej hemorragjia që mund t’i kushtonte jetën.
Por ajo ende nuk e di që i biri ka ndërruar jetë.
“I plagosuri ka pasur disa plagë të lokalizuara në zonën e barkut dhe të qafës. Ka disa dëmtime në organet e brendshme të barkut. Gjendja e përgjithshme është e stabilizuar, ndërkohë do kalojë në pavijon gradualisht për të vazhduar terapinë e mëtejshme. Ndërsa zonja ka një dëmtim në qafë, një hematomë të madhe në regjionin e qafës”, shprehet kirurgu që kreu ndërhyrjen kirurgjikale të 66-vjeçarit dhe bashkëshortes së tij.
