Fatmir Xhafaj jep të dhënat e para për 3 grupet kriminale në Durrës

Ministri i Brendshëm Fatmir Xhafaj deklaroi sot në Durrës se qyteti ka tre grupe kriminale tashmë të identifikuar nga policia. Xhafaj shtoi se ata jo vetëm që do të burgosen por do t’u merren dhe të gjitha pasuritë e fituara nga aktiviteti kriminal.

“Ajo çfarë unë kam thënë dhe i qëndroj është fakti që ne sot jemi në gjendje të dimë se cilat janë grupet kriminale, cili është aktiviteti i tyre çfarë fuqie posedojnë ato dhe njëkohësisht jemi në një veprimtari aktive policore, tashmë dhe në bashkëpunim dhe në drejtimin e Prokurorisë, prokurorive respektive, prokurorive të rretheve gjyqësore dhe Prokurorisë së Krimeve të Rënda për juridiksionin e saj edhe për t’i vënë këto përpara përgjegjësisë penale.
Një pjesë e këtyre grupeve kriminale rreth 9 të tilla në shkallë vendi janë në proces hetimi dhe duke mbajtur në konsideratë faktin se janë arrestuar një numër i caktuar personash si pjesë e këtyre grupeve kriminale”, tha Xhafaj.

Në vijim të fjalës së tij gjatë një takimi me disa qytetarë durrsakë ai tha se Task Forca Qendrore dhe Task Forcat Rajonale janë në një hetim intensiv për disa grupe kriminale, një pjesë ose një numër i cili për hir të së vërtetës është edhe këtu në Durrës. Ne jemi duke punuar fort për t’i goditur ato jo, nga pikëpamja fizike, por nga pikëpamja e ligjit, e forcës dhe e provës së ligjit dhe për t’i vendosur përpara përgjegjësisë.

“Ajo që është shumë interesante dhe që dua ta bëjë fort mirë të qartë, është fakti që krahas ndëshkimit ligjor për veprimtarinë kriminale ne jemi fort të fokusuar edhe te hetimi dhe goditja e aseteve kriminale të tyre. Fuqia e tyre ekonomike, pasuria e vendosur për shkak të kësaj veprimtarie kriminale nuk do të jetë më pronë e tyre, por do të kthehet në shërbim të qytetarëve”, tha ministri.

Ministri tha se operacioni ka nisur para 3-4 muajsh dhe se ky proces kërkon kohën e vet.

Lidhur me grupet kriminale në Durrës ai tha se janë 2 apo 3 grupe kriminale, që për hir të së vërtetës janë grupe që kanë një aktivitet të gjatë në shumë vite, jo të krijuara sot, por ndoshta në 10-15 vjet këtu në qytetin e Durrësit, dhe janë grupe me rrezikshmëri të lartë shoqërore.

/DRONI.al/