Në nëntor të vitit 2017, kryeministri Rama premtoi se do të bënte të mundur ndërtimin e kanalit vaditës në Valikardhë të Bulqizës.
Në shtëpinë e Shaqir Toskës, një fermeri të zonës, kryeministri i vendit, pasi shijoi produktet e fshatit premtoi si “burrat” se kanali vaditës do të ndërtohej shumë shpejt.
Pasi pa projektin e bërë nga ish-Komuna Zerqan, Rama tha asokohe: Shaqir, ka marrë fund. Do ta bëjmë!
Pesë muaj më pas, “Fiks Fare” ka intervistuar banorët e fshatit, të cilët ende presin të vihet në jetë premtimi i kryeministrit Rama.
Mbi 200 familjeve që merren me bujqësi dhe blektori, nga mungesa e ujit vaditës u janë dëmtuar prodhimet, kryesisht misri, gruri dhe fasulja.
“Unë e prita Ramën dhe jam shumë i nderuar. Ende s’kanë nisur punimet për rregullimin e kanalit vaditës, por unë kam shpresa se shumë shpejt do të nisë. Kam bindjen se kryeministri do ta mbajë fjalën”, u shpreh për “Fiks Fare” fermeri Shaqir Toska.
Sipas kryeplakut të fshatit, premtimet politike kanë qenë të shumta, por situata vazhdon të mbetet e njëjtë.
“Kemi mbi 20 vite që marrim premtime për atë kanal, por asgjë nuk është bërë. Na ka ardhur në fshat edhe kryeministri dhe na ka premtuar, por asgjë. Tani presim, ç’të bëjmë?”, u shpreh kryeplaku i fshatit Valikardhë, Agron Allushi.
Së bashku me kryeplakun dhe me një banor të zonës, gazetarët e “Fiks Fare” u ngjitën në mal rreth 1 orë larg fshatit, e pasi mbërritën në kanalin vaditës, banorët treguan sesi gjatë verës e rregullojnë dhe e pastrojnë vet atë.
“Ja ky është kanali. Ne vijmë këtu dhe e pastrojmë vet. Askush nuk ka ardhur ta shohë, as kryeministri nuk u ngjit”, shprehet një nga banorët.
“Fiks Fare” i është drejtuar Bashkisë së Bulqizës. Projekti për kanalin vaditës është bërë që në vitin 2009, me vlerën rreth 22 milionë lekë, më pas në vitin 2013 është dorëzuar po i njëjti projekt, që kap vlerën 52 milionë lekë.
Gjithashtu, sipas Bashkisë së Bulqizës, në vitin 2016 projekti është dërguar sërish në Ministrinë e Bujqësisë për çeljen e një fondi.
“Projektin e kanalit vaditës ne e kemi bërë prej vitesh, në 2009-n, e kemi ridërguar në vitet 2013 dhe 2016, sigurisht me një tjetër fond. Kemi reduktuar shpenzimet, por asgjë për momentin”, u shpreh drejtori i Shërbimeve dhe Emergjencave Civile në Bashkinë e Bulqizës, Hekuran Çami.
“Fiks Fare” iu drejtua zyrtarisht Drejtorisë së Ujitjes dhe Kullimit pranë Ministrisë së Bujqësisë. Përgjigjja erdhi me shkresë zyrtare. Sipas saj, duket se premtimi i kryeministrit ka mbetur në ajër, pasi në shkresë thuhet se kanali ujitës në fshatin Valikardhë i është transferuar në pronësi Bashkisë së Bulqizës, ndaj vet ky institucion, sipas përgjigjes zyrtare, duhet ta financojë me burimet e veta rehabilitimin dhe mirëmbajtjen e kanaleve ujitës që ka në administrim.
