Ky shqiptar I Amerikës mund të zëvëndësonte në pak muaj ambasadorin amerikan në Tiranë Donald Lu por nuk e ka bërë. Bëhet fjalë për kandidatin republikan për guvernator i Konektikatit, Piter Lumaj. Të hënën Lumaj bëri publik propozimin që iu bë për të pasuar Donald Lu në detyrë.
“M’u ofrua një punë si ambasadori i ardhshëm i Shqipërisë për të përfaqësuar Shtetet e Bashkuara” tha Lumaj në një aktivitet të republikanëve. “E refuzova sepse mendoj se mund të shërbej shumë më mirë këtu sesa jashtë” e citojnë mediat lokale.
Lumaj nuk tha se kur iu bë oferta nga administrata Trump dhe po ashtu refuzoi t’i përgjigjej gazetarëve për detaje të tjera.
Peter Lumaj mbërriti në Shtetet e Bashkuara rreth 30 vite më parë dhe e nisi punën e tij si pastrues në Burger King. Pasi mësoi anglisht, nisi kolegjin në Shtetet e Bashkuara për t’u punësuar më pas si jurist në administratën e prokurorit Xhuliani. Sot ai ka një biznes në Konektikat dhe garon si guvernator i Konektikat.
Mandati i Donald Lu mbaroi në fund të vitit të kaluar, por ambasadori aktual e shtyu edhe për 6 muaj.
