Meta flet për marrëveshjen me Greqine: Jemi në proces kushtetues

Presidenti i Republikës Ilir Meta deklaroi sot se procesi I marrëveshjes me Greqinë për kufirin detar është një process solid.

“Jemi në një process solid nga pikëpamja kushtetuese”, tha Presidenti sot para gazetarëve.

Një ditë më parë Presidenti autorizoi ministrinë e Jashtme të vijonte negociatat ndërkohë që një ekspert tjetër u shtua në grupin negociator. Meta tha se Ksenofon Kristafi është një jurist me mjaft eksperiencë në lidhje me marrëveshjen. Propozimi për të është pozitiv dhe i mirëpritur.

Prof. Ksenofon Krisafi është diplomuar si jurist në Fakultetin e Shkencave Politike dhe Juridike të Universitetit të Tiranës në vitin 1969. Ai ka fituar gradën shkencore «Doktor» në vitin 1993. Karrierën e tij të gjatë profesionale, Prof. Krisafi e ka filluar si punonjës shkencor në Sektorin Shkencor të Fakultetit të Shkencave Politike e Juridike të Universitetit të Tiranës, ku ka punuar për mëse 12 vjet.

Më pas, për gati 10 vjet deri në vitin 1993, ai do të atashohej pranë Ministrisë së Jashtme, fillimisht si përgjegjës i Byrosë Juridike, jurist e pastaj drejtor i Drejtorisë së Çështjeve Juridike e Konsullore dhe Traktateve Ndërkombëtare. Aktiviteti në Ministrinë e Jashtme do të vazhdonte më tej në vitet 1998-2002, me detyrën e ambasadorit dhe përfaqësuesit të përhershëm të Republikës së Shqipërisë pranë zyrave të OKB-së dhe të OBT-së në Gjenevë.

Gjatë veprimtarisë së tij në shërbimin diplomatik ka marrë pjesë në dhjetëra konferenca ndërkombëtare apo në takime dy e shumëpalëshe, me cilësinë e anëtarit apo kryetarit të delegacionit. Prof. Krisafi ka gjithashtu një veprimtari të zgjeruar pedagogjike e akademike. Që prej vitit 1971 e deri më sot ai është lektor i së drejtës ndërkombëtare publike në Fakultetin e Drejtësisë, në degën e Gazetarisë dhe në kurset pasuniversitare të Diplomacisë dhe të Tregtisë së Jashtme pranë Universitetit të Tiranës.

Presidenti Meta u shpreh per marreveshjen pasi mori pjesë simpoziumin me temë “Imam Aliu midis traditës dhe modernitetit ”, ku ka vlerësuar bektashizmin dhe figurën e Imam Aliut. Ai tha se kontributi filozofik dhe personaliteti i Imam Aliut vazhdon të inspirojë dhe se për bektashinjtë, Shqipëria ngelet mbi gjithçka.

“Jam i lumtur që jemi bashkë në këto momente në prag të festes së Sulltan Novruzit. Në këto ditë vëmendja, përkushtimi dhe dashamirësia shkojnë për besimtarët bektashinj. Besimi që ju përfaqësoni dhuron përherë shpresë mirëkuptim, paqe dhe harmoni. Vlerësoj idenë e Kryegjyshatës Botërore Bektashiane për të trajtuar në simpoziume ide rreth doktrinës bektashiane e rolit të prelatëve të saj. Kontributi filozofik dhe personaliteti i Imam Aliut vazhdon të inspirojë e të ngelet i qenësishëm. Në thelb të veprës së vet Imam Aliu predikoi dhe lartësoi dijen dhe drejtësinë. Vlerat e vërteta njerëzore, paqja shpirtërore dhe progresi shoqërisë e kanë burimin te dituria dhe drejtësia”, deklaroi Meta.

/DRONI.al/