Presidenti Ilir Meta i ka hapur dritën jeshile vazhdimit të negociatave në nivel ekspertësh për çështjen e kufirit detar me Greqinë.
Kreu i shtetit ka firmosur në orët e pasdites së të kësaj të hëne vendimin që autorizon ministrin e Jashtëm Ditmir Bushati për vazhdimin e negociatave me palën greke, njofton top channel përmes faqes së tij online.
Kjo lëvizje e Presidentit zhbllokon bisedimet mes Tiranës dhe Athinës për një sërë çështjesh në diskutim, por edhe vizitën e kryeministrit grek Tsipras për pashkët ortodokse në Korçë, ku do të takojë Ramën.
Një ditë më parë, përmes një interviste për gazetën greke “To Vima”, Ilir Meta tha se marrëveshja e re për kufirin detar nuk duhet të kalojë “vijën e kuqe”, që ai tha se është vendimi i Gjykatës Kushtetuese të Shqipërisë, kur argumentoi rrëzimin e marrëveshjes Berisha-Karamanlis të 2009.
“Shqipëria dhe Greqia janë të interesuara që marrëveshja për detin të jetë ligjërisht e përkryer, praktikisht e zbatueshme dhe përfundimisht e pakthyeshme”, ka thënë ai.
Ilir Meta refuzoi të japë më herët autorizimin për plotfuqishmërinë e Bushatit duke kërkuar që të saktësohet objekti i qartë për autorizimin e plotfuqisë, si dhe të plotësohen emrat, funksionet dhe profesionet e atyre që do të jetë pjesë e grupit negociator.
“Presidenti s’mund të anashkalojë asnjë moment. Nuk mund të bëhem pjesë e asnjë cenimi të Kushtetutës, të vendimit të Gjykatës Kushtetuese, të asnjë bashkëfajësie, qoftë edhe padashje”, deklaronte Meta.
