Një stuhi me erëra të forta që pritet në Vlorë ka detyruar bashkinë e drejtuar nga Dritan Leli të lëshojë alarmin për “apokalipsin”.
Bashkia ka njoftuar se, “sipas meteorologëve parashikohen shira dhe erëra të forta. Të gjithë punonjësit e Bashkisë Vlorë janë në gatishmëri të plotë. Ju lutemi merrni masat për të shmangur lëvizjet afër pemëve, afër shtyllave të tensionit si dhe parkimin në zonat e rrezikshme.
Të kufizohen në maksimum lëvizjet në rrugë për shkak të erërave shumë të forta”, thuhet në njoftimin e saj.
Për shkak të erës së fortë, sot ka pasur probleme në qytet, me rrëzimin e palmave dhe dëmtimin e një automjeti. Në zonën e Skelës një fëmijë 10-vjeçar është përplasur me zgarat e punimeve të rrugës duke marrë plagë të lehta.
Ndërkohë, moti i keq ka pezulluar lundrimin detar në Vlorë. Trageti prej ditës së djeshme qëndron në radë, duke mos i ankoruar dot njerëzit për shkak të erës së fortë dhe detit me dallgë nga 7 deri ne 8 ballë . Forca e detit është 8 ballë në det të hapur, ç’ka krijon mjaft vështirësi por edhe rrezikshmëri tek mjetet lundruese.
Kapiteneria e portit te Vlorës ka urdhëruar të gjitha mjetet e tjera lundruese dhe ato të peshkimit të mos dalin në det për shkak të motit të keq,ndërsa edhe trageti i linjës Vlorë – Brindizi gjatë ditës së shtunë nuk do të kryejë itenerarin e zakonshëm,ndërsa pritet vetëm gjatë ditës se diel përmirësimi i situatës nga moti.
