Policia greke ka arrestuar të dielën tre shtetas shqiptarë, të moshës 34, 30 dhe 25 vjeç, me akuzën e futjes në Greqi të një sasie të madhe droge.
Ata u arrestuan në vendin e quajtur Mesopotami, në rrethin e Kosturit.
Sipas komunikatës zyrtare, pas një sinjalizimi, patrulla e policisë ndaloi për kontroll dy mjete që po vinin nga ana e kufirit me Shqipërinë.
Në mjetin e dytë, që kishte për drejtues 25 vjeçarin, u gjetën 155,9 kg kanabis, të paketuara në 149 ambalazhe plastmasi.
Sipas policisë, ky ishte mjeti i dytë, ndërsa mjeti i parë, ishte si pararojë dhe kishte për detyrë të njoftonte për postblloqet e mundshme të uniformave blu.
Përveç sasisë së drogës dhe dy automjeteve, policia sekuestroi në cilësinë e provës edhe 2.000 euro, 4 telefona celularë dhe 7 karta sim.
Më herët, po në zonën e Kosturit, ishte arrestuar një tjetër shtetas shqiptar, me 54,4 kg kanabis.
Departamenti i anti drogës i policisë së Kosturit po heton për lidhje të mundshme ndërmjet dy ngjarjeve, ndërsa tre të arrestuarit do të dërgohen në prokurori.
